india

സോളാര്‍ പ്രഭയില്‍ ശ്രീപുരം സ്‌ക്കൂള്‍- കണ്ണൂര്‍ ജില്ലയില്‍ വേറിട്ടൊരു മാതൃകയായി മാറി.

Tiju Kannampally  ,  2018-03-15 07:19:17amm

കണ്ണൂര്‍  : ശ്രീപുരം ഇംഗ്ലീഷ്‌ മീഡിയം ഹൈസ്‌ക്കൂള്‍ ആന്‍ഡ്‌ ജൂനിയര്‍ കോളേജ്‌ സോളാര്‍ പവര്‍ പ്ലാന്റിന്റെ പ്രവര്‍ത്തനോദ്‌ഘാടനം കണ്ണൂര്‍ ജില്ല പഞ്ചായത്ത്‌ പ്രസിഡന്റ്‌ കെ.വി സുമേഷ്‌ നിര്‍വ്വഹിച്ചു. ശ്രീപുരം സ്‌ക്കൂള്‍ കണ്ണൂരിന്റെ ഐശ്വര്യമാണെന്നും സ്‌ക്കൂള്‍ കാണിച്ച്‌ തന്ന മാതൃക എല്ലാവര്‍ക്കും ഒരു നല്ല പാഠമായി മാറണം എന്നും ഉദ്‌ഘാടന പ്രസംഗത്തില്‍ പറഞ്ഞു.കണ്ണൂര്‍ ജില്ലയില്‍ സോളര്‍ പ്രഭയില്‍ പ്രവര്‍ത്തിക്കുന്ന ഏറ്റവും വലിയ സ്‌ക്കൂള്‍ ആയി കോട്ടയം അതിരൂപതയിലെ ശ്രീപുരം ഇംഗ്ലീഷ്‌ മീഡിയം ഹൈസ്‌ക്കൂള്‍ ആന്‍ഡ്‌ ജൂനിയര്‍ കോളേജ്‌ മാറി. മൂവായിരത്തോളം കുട്ടികള്‍ വിദ്യ അഭ്യസിക്കുന്ന ശ്രീപുരം സ്‌ക്കൂളിനാവിശ്യമായ വൈദ്യുതി ഇതുവഴി ഉദ്‌പാദിപ്പിക്കുവാന്‍ സാധിക്കും. പ്രകൃതി കനിഞ്ഞ്‌ നല്‍കുന്ന സൗരോര്‍ജ്ജം പ്രയോജനപ്പെടുത്തി നന്മയുടെ കൈമാറ്റവും,മാതൃകയും നല്‍കുവാന്‍ കഴിഞ്ഞുവെന്ന്‌ കോട്ടയം അതിരൂപത സഹായ മെത്രാന്‍ മാര്‍ ജോസഫ്‌ പണ്ടാരശ്ശേരില്‍ പറഞ്ഞു. 30 കിലോവാട്ട്‌ ശേഷിയുളള സോളാര്‍ പവര്‍ പ്ലാന്റില്‍ നിന്നും ദിവസം ശരാശരി 120 യൂണിറ്റ്‌ വൈദ്യുതി ഉദ്‌പാദിപ്പിക്കുവാന്‍ കഴിയും. ഗവണ്‍മെന്റിന്റെ സാമ്പത്തിക സഹായത്തോടെ അനര്‍ട്ടിന്റെ അംഗീകൃത ഏജന്‍സിയായ റ്റാറ്റ പവര്‍ സോളാറാണ്‌ ഈ പ്ലാന്റ്‌ സ്ഥാപിച്ചിരിക്കുന്നത്‌. സ്‌ക്കൂള്‍ മാനേജര്‍ ഫാ. അബ്രാഹം പറമ്പേട്ട്‌,പ്രിന്‍സിപ്പല്‍ ഇന്‍ ചാര്‍ജ്‌ സി.നൈജി, വൈസ്‌ പ്രിന്‍സിപ്പല്‍ ഫാ.ലിജോ കൊച്ചുപറമ്പില്‍, പി.ടി.എ പ്രസിഡന്റ്‌ സി.കെ കുര്യാച്ചന്‍, മറ്റ്‌ സ്റ്റാഫ്‌ അംഗങ്ങള്‍, വിദ്യാര്‍ത്ഥികള്‍, അനര്‍ട്ടിന്റെ ജില്ലാ ഓഫിസര്‍ മിനിഷ്‌ പി.കെ തുടങ്ങിയവര്‍ ചടങ്ങില്‍ പങ്കെടുത്തു. സോളാര്‍ പ്രഭയില്‍ ശ്രീപുരം സ്‌ക്കൂള്‍ കണ്ണൂര്‍ ജില്ലയില്‍ വേറിട്ടൊരു മാതൃകയായി മാറി



Latest

Copyrights@2016.