gulf

അതിരൂപതാ യു പി വിഭാഗത്തിലെ മികച്ച അധ്യാപക അവാർഡിന് ബിനു ജേക്കബ് അർഹനായി

Saju Kannampally  ,  2018-01-14 11:25:05pmm

കോട്ടയം അതിരൂപതാ കോർപ്പറേറ്റ് എഡ്യൂക്കേഷണൽ ഏജൻസി യു പി വിഭാഗത്തിലെ മികച്ച അധ്യാപകന് ഏർപ്പെടുത്തിയ അവാർഡിന് സേക്രഡ് ഹാർട്ട് ഹയർ സെക്കൻഡറി സ്‌കൂൾ അധ്യാപകൻ  ബിനു ജേക്കബ് അർഹനായി. അധ്യാപന മേഖലയിലെ മികവും പാഠ്യേതര പ്രവർത്തനങ്ങളിലെ പങ്കാളിത്തവും വഴി വിദ്യാർത്ഥി സമൂഹത്തിനും സ്‌കൂളിനും നൽകിയ കനപ്പെട്ട സംഭാവനകളാണ് അദ്ദേഹത്തെ ഈ അവാർഡിന് അർഹനാക്കിയത്. ക്ലാസ്‌മുറികളിൽ മൗലികമായ അധ്യാപന രീതികൾ പിന്തുടരുന്ന ബിനു സാർ താൻ വിനിമയം ചെയ്യുന്ന വിഷയങ്ങളിൽ നൂതനാവിഷ്കാര സാധ്യതകൾ പരമാവധി പ്രയോജനപ്പെടുത്താൻ നിതാന്ത ശ്രദ്ധ പുലർത്തുന്നു. വിദ്യാലയത്തിന്റെ പൊതുതാൽപര്യം ലക്ഷ്യമാക്കി നടത്തുന്ന ഏത് പരിപാടികളിലും സ്വതസിദ്ധമായ തന്റെ സർഗ്ഗാത്മകതയുടെ കയ്യൊപ്പ് ചാർത്തുന്ന ബിനു സാർ മികവുറ്റ ചിത്രകാരനും ശ്രദ്ധേയനായ സംഘാടകനും അനുഗ്രഹീത ഗായകനും അളവില്ലാത്ത നർമബോധത്തിന് ഉടമയുമാണ്. കഴിഞ്ഞ 20 വർഷത്തോളമായി തിരുഹൃദയ വിദ്യാലയത്തിന്റെ സ്പന്ദനങ്ങൾ തൊട്ടറിഞ്ഞ് വിദ്യാലയത്തിനും കുരുന്നുകൾക്കും സഹപ്രവർത്തകർക്കും തണലായി വർത്തിക്കുന്ന ബിനു സാർ ടി ടി സി ക്ക് പുറമെ മലയാള സാഹിത്യത്തിൽ ബിരുദവും ബി എഡും കരസ്ഥമാക്കിയിട്ടുണ്ട്. പയ്യാവൂർ സ്വദേശിയായ അദ്ദേഹം വിശ്വാസ പരിശീലന രംഗത്തും സഭാത്മക പ്രവർത്തനങ്ങളിലും സജീവമാണ്. ഭാര്യ ലൈസ കോട്ടയം ചാമക്കാലാ സ്വദേശി. മക്കൾ ജേക്കബ്, റിയ. ഹൃദയപൂർവ്വം അഭിനന്ദനങ്ങൾ.

 



Latest

Copyrights@2016.