india

കുടിയേറ്റത്തിന്റെ 75 മാത് വാർഷികത്തിൽ, കുടുംബസംഗമമൊരുക്കി ചമ്പന്നിൽ കുടുംബം

Editor  ,  2017-04-09 11:35:41amm ക്ലിന്റിസ് ജോർജ്ജ്

രാജപുരം: 1943 ഫെബ്രുവരി 2-ാം തീയ്യതി നടന്ന കോട്ടയം രൂപതയിലെ 72 ക്‌നാനായ കുടുംബങ്ങളുടെ സംഘടിതമായ രാജപുരം കുടിയേറ്റം, രൂപതയുടെതന്നെ ചരിത്രത്താളുകളില്‍ പ്രശസ്തിയുടെ പുതിയൊരദ്ധ്യായംകൂടി എഴുതിച്ചേര്‍ത്തു. അന്നുതൊട്ടിന്നുവരെ ചരിത്ര വ്യക്തിത്വമോ, പ്രതാപമോ, പ്രശസ്തിയോ ഒന്നുമില്ലെങ്കിലും കുടിയേറ്റ കുടുംബങ്ങളിലെ കാരണവന്മാര്‍ ഓരോ വേദികളിലും അനുസ്മരിക്കപ്പെടുകയും ആദരിക്കപ്പെടുകയും, താരതിളക്കത്തോടെ ജനമനസ്സുകളില്‍ ജീവിക്കുകയും ചെയ്തു വരുന്നു. ദാരിദ്ര്യത്തോടും, മലമ്പനിയോടും, കാട്ടുമൃഗങ്ങളോടും, നിരന്തരം പടപൊരുതി, അങ്കം ജയിച്ച് പുതുതലമുറയ്ക്ക് സമ്പല്‍സമൃദ്ധമായ ജീവിതത്തിന് അടിത്തറ പാകിയ വീരന്മാരായ അവരെ സമൂഹ മധ്യത്തില്‍ ഉയര്‍ത്തിക്കാട്ടുമ്പോള്‍ ഞങ്ങളുടെ ഈ പുതുതലമുറ മതിമറന്നാഹ്ലാദിക്കാറുണ്ട്. കുടിയേറ്റത്തിന്റെ എഴുപത്തിയഞ്ചു വര്‍ഷം പിന്നിട്ടപ്പോള്‍ ആ പൂര്‍വ്വ മാതാപിതാക്കളില്‍ 99 ശതമാനവും കാലയവനികയ്ക്കുള്ളില്‍ മറഞ്ഞെങ്കിലും അവരെ നന്ദിയോടെ അനുസ്മരിക്കാനും, ആദരിക്കാനും സഭാ നേതൃത്വം താല്‍പര്യം കാണിക്കാറുണ്ട്. രാജപുരം തിരുകുടുംബ ദേവാലയത്തിലെ പ്രധാന തിരുനാള്‍ കുടിയേറ്റത്തിരുന്നാളായി ആഘോഷിക്കുമ്പോള്‍ ഒരു ദിവസം മണ്‍ മറഞ്ഞ പൂര്‍വ്വപിതാക്കള്‍ക്കായി മാറ്റിവെച്ചിരിക്കുകയാണ്. അവര്‍ക്കുവേണ്ടി വിശുദ്ധ കുര്‍ബാനയും, ഒപ്പീസും, സിമിത്തേരി സന്ദര്‍ശനവും മുടക്കം കൂടാതെ നടത്തി വരുന്നു. ഇത് പ്രശംസനീയമായ ഒരാചാരമാണെന്ന് സമ്മതിച്ചേ തീരൂ. മാതാപിതാക്കളുടെ ചരമദിനം ഓര്‍ക്കാനും, അവര്‍ക്കുവേണ്ടി പ്രാര്‍ത്ഥിക്കുവാനും, ആത്മരക്ഷയ്ക്കുളള പരിഹാര കര്‍മ്മങ്ങള്‍ അനുഷ്ഠിക്കുവാനും അനന്തര തലമുറയ്ക്ക് ഇത് പ്രചോദനമാവുക തന്നെ ചെയ്യും.

സംഘടിതമായ മലബാർ കുടിയേറ്റത്തിന്റെ 75 മത് വാർഷികത്തിൽ, ആദ്യകാല കുടിയേറ്റ കുടുംബത്തിലെ കുടുംബനാഥയുടെ ഇരുപത്തി അഞ്ചാമത് ചരമവാർഷികം കുടുംബസംഗമാക്കി കൊണ്ട് രാജപുരത്ത് ചമ്പന്നിൽ പോത്തൻ ചാച്ചി ദമ്പതികളുടെ പിന്മുറക്കാർ. ഫെബ്രുവരി 14 ന് രാജപുരത്ത് നടന്ന ചരമവാർഷികാചരണത്തിന് മുഖ്യ കാർമികത്വം വഹിച്ചത് ചാച്ചിയുടെ സഹോദരപുത്രനും പുതുവേലിപ്പള്ളി വികാരിയുമായ ജേക്കബ് വാലയിൽ അച്ഛനാണ്.

കുടിയേറ്റഭൂമിയിൽ കയ്യും മെയ്യും മറന്ന്, ജീവിക്കുവാനുള്ള ഇഛാശക്തിയുമായി രോഗങ്ങളോടും, വന്യമൃഗങ്ങളോടും, കാലാവസ്ഥയോടും പടവെട്ടി ജീവിതം കരുപ്പിടിപ്പിച്ച പോത്തൻ ചാച്ചി ദമ്പതികളുടെ നാല് തലമുറയിൽ പെട്ടവർ ഒത്തു ചേർന്നപ്പോൾ കുടിയേറ്റത്തിന്റെ ജൂബിലി വർഷത്തിലെ അനുഭൂതി പകരുന്ന ഒരു കുടുംബ സംഗമമായി ഈ കൂട്ടായ്മ മാറി.



Latest

Copyrights@2016.